Во рамките на Build 2025 конференцијата Microsoft најави дека веќе нема да го наплаќа еднократниот трошок кој програмерите мораат да го платат за да креираат сметка и да ги објавуваат своите апликации во Microsoft Store.
Со оваа одлука, објавата на апликации за Windows 11 и Windows 10 станува бесплатна за програмерите, иако во случајот со Microsoft сумата и не беше толку висока.
Програмерите досега мораа да платат 19 долари еднократно за нивната програмерска сметка, по што можат слободно да ги објавуваат нивните апликации, како и да ги користат додатните сервиси, како системот за известувања и слично.
Оваа промена важи само за индивидуалните програмери, додека компаниите ќе продолжат да ја имаат сумата од 99 долари еднократно.
Во случајот со Google, овој трошок изнесува 25 долари еднократно, додека Apple се „најскапи“ и наплаќаат 99 долари годишно за индивидуалните програмери.
Јасно е зошто од Microsoft се одлучуваат на еден ваков потег, па и јас како нив се надевам дека ова ќе доведе до повеќе апликации достапни преку Microsoft Store.
