Според британската компанија Which?, Google Chrome е најлошиот интернет прелистувач кога е во прашање откривањето на „фишинг“ измамите, односно нападите. Според резултатите од оваа компанија, Chrome има откриено и спречено само 28% од нападите на Windows и само 25% од нападите на macOS.
Ова, според компанијата, е загрижувачки кога ќе се земе во предвид дека ова најмногу користениот прелистувач во Британија, а истото важи и за остатокот од светот.
„Фишинг“ измами се веб страни кои се направени да изгледаат идентично како други страни, на пример банкарски страни и слично, со што корисниците треба да бидат измамени да ги внесат своите податоци на нив. Со тоа овие страни ги добиваат лозинките, картичките и слични податоци од корисниците.
До ваквите страни најчесто се стига преку линкови во имејл пораки, но ги има и преку SMS, а исто така и на одредени веб страни.
За разлика од Chrome, другите прелистувачи се имаат покажано многу подобро, па така на Windows најдобро се покажува Mozilla Firefox со 85% спречени измами, додека на macOS овој процент изнесува 78%.
Microsoft Edge успева да „фати“ 82% од „фишинг“ измамите, додека Apple Safari 77%.
Opera исто така се нема покажано баш најдобро, па на двете платформи процентот на заштита изнесува 56%.
Од Google очекувано излегоа со изјава за ова истражување и според нив тоа не е баш точно. Тие посебно го истакнуваат фактот дека Firefox го користи истиот систем како Chrome, па има доста подобар резултат, нешто што според нив воопшто нема логика.
Како и да е, не би било лошо и други компании да излезат со сопствени истражувања за да поточно се знае колку е безбеден најпопуларниот интернет прелистувач во светот.
Треба да се напомене и дека најдобрата заштита на крајот сепак е логиката на корисниците, односно практиката да не се отвораат линкови од било каде, а посебно не од имејл пораки од непознати адреси.