Во време кога нема компанија која не се приклучува на трендот на вештачка интелигенција, добро е што има и компании кои сметаат дека потребно е да се забави и да се видат ефектите од сето ова.
Ко-основачот и директор на познатиот Vivaldi прелистувач, кој е и поранешен ко-основач на Opera прелистувачот, излезе со објава преку која тој едноставно кажува дека тие нема да воведуваат функции со вештачка интелигенција во нивниот прелистувач.
На ова секако може да се гледа како на маркетинг, односно обид Vivaldi да привлече нови корисници, но без разлика, ова е одлична вест која не би било лошо и други да ја следат.
Џон вон Тетснер, својата објава ја насловува со „Vivaldi зазема став: продолжете да сурфате човечки“. Логично нагласува дека сурфањето треба да ги насочува луѓето да истражуваат, да бркаат идеи и да донесуваат сопствени одлуки. Vivaldi ги бира луѓето над „возбудата“ за ВИ и нема да го претвори задоволството на сурфањето во неактивно гледање.
Тетснер истакнува и дека доколку вештачката интелигенција биде направена така што ги насочува корисниците кон целите на компанијата, но и ја штитат нивната приватност, тие ќе вградат функции со јазичните модели.
Ефектот од вештачката интелигенција веќе го гледаме во повеќе форми. Луѓето стануваат повеќе зависни, тие помалку истражуваат, на професионалците им се намалува способноста, а тука е и намалување на читаноста на веб страните поради фактот што корисниците ги читаат кратките сумирани делови, наместо да ја отворат целата страна.
