ChatGPT доби доста новини изминатиот период, па од OpenAI сега најавија и апликации во овој „четбот“. За почеток од компанијата претставија неколку апликации во соработка со нивните партнери, но со достапноста на новата Apps SDK алатка, сите ќе можат да ги поврзат нивните сервиси со ChatGPT.
Апликациите во ChatGPT во основа претставуваат можност за директно поврзување со некоја од познатите веб страни, на пример, со цел да се побара извршување на некоја активност.
Една од првите апликации е таа од Booking.com, па корисниците ќе можат директно преку ChatGPT да побараат листа на слободни места за сместување. Веднаш може да се види колку би биле корисни овие нови апликации, па наместо корисникот да бара самиот на Booking.com, ChatGPT ќе ги пронајде најдобрите места според барањата на корисникот.
За почеток, покрај Booking.com, достапни се апликации од Canva, Coursera, Expedia, Figma, Spotify и Zillow.
Апликациите ќе им бидат достапни на сите видови на корисници на ChatGPT, а достапноста секако ќе зависи и од самиот сервис.
