Иако од OpenAI работат на автоматска проценка на возраста на корисниците, со помош на ВИ секако, ChatGPT доби уште подобар начин за родителите да се чувствуваат посигурно кога нивните деца ја користат оваа алатка.
„Родителските контроли“ станаа официјална можност кај ChatGPT, па родителите ќе можат да се поврзат со сметките од нивните малолетни деца и со тоа да бидат посигурни какво искуство ќе имаат тие преку оваа доста популарна алатка.
За контрола на сметката на децата, родителите се што треба да направат е да ја поврзат нивната сметка со таа на детето. Тоа се прави преку испраќање на покана, а истото може да го направи и детето.
Со самото додавање на сметката како дел од родителските контроли, сметката на детето автоматски добива посебно ниво на заштита од видот на содржина кој ќе се прикажува во разговорите.
Родителите ќе имаат пристап до прилагодувањата на ChatGPT во име на своите деца, а тие нема да можат да ги прават промените самите.
Прилагодувањата ги вклучуваат веќе достапните како можноста за исклучување на учеството во подобрување на јазичниот модел, исклучување на меморијата, исклучување на гласовен режим, генерирање на слики, како и намалување на чувствителна содржина. На крајот, родителите ќе имаат можност да изберат во кои чесови децата веќе нема да можат да го користат ChatGPT.
Родителите ќе добиваат и известувања доколку разговорите кои ги прават нивните деца со ChatGPT укажуваат на некој сериозен проблем, а потврда за истото ќе има преку проверка на разговорот од страна на стручни лица.
OpenAI во неколку наврати сепак истакнува дека приоритет за безбедноста треба да бидат разговорите кои родителите ги имаат со своите деца, односно како тие ќе ги учат за користењето на вакви алатки.
