Windows на ARM чипови е долга приказна која изгледа конечно има успешен крај. Две причини би издвоил како клучни за ова, а тоа е конечното користење на сериозни и одлични чипови, а тие дојдоа како резултат на огромниот успех на MacBook компјутерите и М чиповите од Apple кои се ARM чипови.
Претходно, Windows на ARM беше толку лошо искуство, па кога на тоа ќе се додадеше и многу лошата достапност на апликации, јасно беше зошто досега овој „проект“ од Microsoft беше неуспешен.
Со претставувањето на Snapdragon X серијата на чипови и Copilot+ компјутерите се виде посветеноста на компаниите овој пат ARM приказната да биде успешна, а сега ги имаме и првите докази дека тоа е така.
Покрај хардверот и Windows 11, уште една работа е клучна за успехот, а тоа е достапноста на апликации кои се развиени за ARM архитектурата, наместо истите да функционираат преку емулатор кој сепак не овозможува ни приближно добри перформанси.
Според најновата објава од Microsoft, 90% од вкупните кориснички минути поминати на Windows 11 на ARM, се на изворни апликации, односно апликации кои се од основата развиени за оваа платформа.
Тоа се одлични вести, а секако заинтересираноста на програмерите се должи на конечно обезбеденото одлично корисничко искуство на компјутерите кои покрај добрите перформанси, овозможуваат и одлично траење на батеријата.
Во својата објава Microsoft има цела листа на апликации кои сега се изворни, а тие се поделени по категории и ги вклучуваат такви како Bitdefender Endpoint Security, 1Password, Avast, ESET, Express VPN, NordVPN, 7 Zip, Antutu, Microsoft 365, Slack, Trello, Adobe апликациите и уште доста, а листата можете да ја погледнете тука.
Покрај тоа што Windows на „обичните“ чипови, како тие од Intel, нема наскоро да биде минато, сепак сега е јасно дека се поголем процент од компјутерите ќе работат на ARM чиповите, а во голем дел заслужни за тоа се Apple.
