Овогодинешниот СоМо Борач (SoMo Borac), најважната дигитална награда во рамки на Weekend Media Festival, покрај тоа што доделува 24 статуетки печатени во 3D технологија, има и нови категории
Како што се приближува најпопуларниот регионален медиумско – маркетиншки фестивал, Weekend Media Festival во Ровињ, Хрватска, доаѓа и времето за СоМо Борач (SoMo Borac), најважниот настан и собир на професионалци од дигиталната сфера, кој се одвива веќе трета година по ред. СоМо Борач ги препознава најдобрите од дигиталниот свет, па така и оваа година ќе додели дури 24 статуетки печатени во 3D технологија, во осум категории.
Некои од нив се веќе познати од минатите години: SoMo Face (најдобра службена Фејсбук страна), SoMust Have (останати социјални мрежи – Twitter, Instagram и слично), CM на годината (Community Manager на годината) и SoMo Content (најдобар маркетиншки проект со дигитална содржина). Категоријата Вирален блокбастер (Viral blockbuster) е проширена на сите вирални содржини – клучно е да е вирална, а може да биде видео, гиф, инфографик и слично. Категоријата SoMo Tech ги наградува најдобрите мобилни, веб, Фејсбук апликации, апликации за паметни (smart) часовници или слична примена на технологијата. Во категоријата Дигитален микс (претходно There’s not a problem I can’t fix cause I can do it in the mix) новост е дека може да бидат пријавени сите кампањи кои се одвивале на повеќе дигитални канали. Последна новост е категоријата Дигиталец на годината, во која компаниите ги пријавуваат одговорните лица од сопствените дигитални оддели или одговорните лица за дигитални проекти, кои ќе се натпреваруваат со најквалитетните проекти и остварувања.
Имаме новост и во жирито. Оваа година, покрај класичното жири, постојат и предселектори кои го избираат првиот круг од оние кои аплицирале. Во предселекциското жири се: Драган Варагиќ (Србија), Иван Брезак Бркан (Хрватска), Миа Биберовиќ (Хрватска) и Екрем Дупановиќ (Босна и Херцеговина).
Главното жири го сочинуваат: Никола Врдољак (404, Хрватска), Борис Личина Борја (Jasno i Glasno, Хрватска), Владо Кармелиќ (Drap, Хрватска), Дубравко Опашиќ (Degordian, Хрватска), Матеј Шполер (Infinum, Хрватска), Вања Берталан (Web Burza), Владимир Чосиќ (McCann, Србија), Никола Бараќ (Huge Media, Србија), Игор Бозовиќ (Executive Group, Србија), Иван Живковиќ (Pioniri, Србија), Сашо Димитриевски (Pristop/Renderspace, Словенија), Зоран Тројер (Sonce.net, Словенија), Дубравко Грубишиќ (httpool, Босна и Херцеговина), Ејуб Кучук (Mita group, Босна и Херцеговина), Филип Арсов (Synapse – Digital Agency, Македонија), Дарко Булдиоски (New Media, Македонија) и Тарик Заимовиќ (Bild Studio, Црна Гора).
На крај, најважна вест за сите вредни професионалци од дигиталната сфера – пријавувањето е отворено! И секако, како и сите минати години, истото е бесплатно.
