Уште во мај оваа година Nothing го најавија претставувањето на нивниот Phone (3), кој за разлика од претходните модели, ќе биде позициониран во повисоката класа и ќе се обиде да им конкурира на најдобрите.
Минатиот месец беше објавено дека чипот на којшто ќе работи овој телефон е Snapdragon 8s Gen 4, па некако се намалија очекувањата за сериозно конкурирање со Galaxy S серијата, на пример.
Телефонот сега е официјално претставен, па со цената од 800 долари јасно е дека ќе биде позициониран во повисоката класа, односно треба да конкурира со основниот Galaxy S25 модел и сличните.
Иако Phone (3) е направен во карактеристичниот стил од претходниците, една од главните промени е тргањето на Glyph интерфејсот по кој од компанијата и станаа познати со првите модели.
Наместо овие на различни места поставени сијалички, Nothing Phone (3) има мал кружен екран кој ги прикажува работите во очигледно истакнати пиксели, каков што е и корисничкиот интерфејс на NothingOS.
На овој екран може да се видат одредени информации, а достапни се и интересни, но не нешто посебно корисни функции.
Екранот на Phone (3) е со големина од 6,67 инчи и е направен со AMOLED технологија, а има резолуција од 2800 на 1280 пиксели, со што се добива нивна густина од 460 пиксели на инч.
Заштитата на екранот е уште една работа покрај чипот која не е баш од највисоката класа, па наместо Gorilla Glass Victus, телефонот доаѓа со Gorilla Glass 7I.
Камерите, кои се на чуден начин поставени на задната страна ги има три и сите доаѓаат со сензор од 50 мегапиксели. „Селфи“ камерата исто така има 50 мегапиксели.
Батеријата е една од подобрите карактеристики на Nothing Phone (3) и истата има капацитет од 5.150 mAh, а може да се полни со полнач од 65 W.
Повеќе за првото искуство со Nothing Phone (3) има што да каже познатиот „Mrwhostheboss“ во видеото во продолжение.
