Meta, поточно директорот Марк Закерберг, ги претставија нивните најнови паметни очила кои ги претставуваат под брендот на Ray-Ban. Овој пат очилата се нешто поразлични и го носат името Ray-Ban Display.
Како што може да се претпостави од самото име, Meta Ray-Ban Display очилата сега доаѓаат со вграден екран, со што дел од информациите можат да се видат без потреба од проверка на телефонот, со што може да се каже и дека започнува најавената замена на смартфоните. Овој процес сепак ќе потрае, да не мислите дека крајот на телефоните е блиску.
Екранот е вграден директно во очилата, но се прикажува само по потреба, што значи дека корисниците ќе имаат стандардно целосен поглед кон околината. Екранот е во боја и со висока резолуција и е поставен малку на страна со цел корисникот да може да продолжи да ја гледа околината дури и кога е прикажан.
Новите Meta Ray-Ban Display очила покрај екранот, вклучуваат и микрофони, звучници, како и досега достапна камера.
За контрола на корисничкиот интерфејс кој се прикажува на екранот, Meta ја претстави и нараквицата Meta Neural Band која успешно го следи секое движење на мускулите, а со тоа и најмалото движење на раката или прстите.
Очекувано, голем дел од очилата е и Meta AI, а вештачката интелигенција дури може да прикажува генерирани слики врз околината, па корисниците можат доста лесно и корисно да видат како нешто би изгледало на одредена позиција.
Meta Ray-Ban Display овозможуваат и читање на пораки и правење на видео повици, зумирање со камерата, навигација, преводи и титлови, како и пуштање на музика.
Овие нови очила ќе се продаваат по цена од 799 долари во САД, плус данок секако, а дали би биле достапни во нашата земја, не сум сигурен.
Еден од најпознатите „јутјубери“ кој тестира вакви производи, Mrwhostheboss, а е доста интересен, веќе има видео со тест од Meta Ray-Ban Display, па можете да го погледнете во продолжение.
