Фрагментираноста на Android системот и уредите е поголема од било кога

Една од главните карактеристики на Android оперативниот систем е неговата отвореност, која што овозможува секој кој што сака да го промени и прилагоди за сопствените потреби. Сето тоа е можно бесплатно, односно за користење и измена на оперативниот систем не се плаќа лиценца. Тоа доведува да бројот на различни верзии од овој оперативен систем е голем, како и бројот на различни уреди. Според одредени луѓе оваа таканаречена фрагментираност е еден од најголемите проблеми на платформата, меѓутоа според други токму ова е причината зошто овој оперативен систем моментално е најпопуларниот систем во светот. Ниту еден друг оперативен систем не ги нуди можностите како Android, нешто што е искористено од голем број на компании.

Главниот проблем кога се збори за фрагментираноста на Android е во комплицираноста која што се јавува за програмерите при развивањето на апликациите. Поради огромниот број на верзии, како и уреди кои што имаат различен хардвер, големина на екран и слично, програмерите не се во можност да ги тестираат и со тоа оптимизираат своите апликации за сите нив. Меѓутоа од друга страна ваквата ситуации им овозможува пристап до огромен број на корисници, а со тоа и добра можност за заработка.

Во продолжение можете да ги погледнете резултатите од истражувањето на OpenSignal компанијата за фрагментираноста на Android оперативниот систем и уредите на кои што се користи. Начинот на кој што е извршено истражувањето е преку симнување на нивната апликација од страна на корисниците, што во овој случај тоа е направено од страна на 682.000 корисници. Од овие корисници добиени се следните информации:

• На Android оперативниот систем работат 18.796 различни уреди, што е зголемување од минатата година кога имало 11.868 уреди, односно 3.997 во 2012 година
• Најновата верзија од оперативниот систем, односно 4.4 KitKat ја користат 20,9% од корисниците
• Најголемиот производител на Android уреди е Samsung со 43% од уредите кои што се користат, што е намалување за разлика од минатата година кога уделот изнесувал 47,5%
• Производителот кој што е на второ место, Sony, има само 4,8% пазарен удел
• 10-те најпопуларни уреди на пазарот сочинуваат 15% од сите уреди, процент кој што минатата година изнесувал 21%
• Развиените земји имаат поголем процент на корисници кои што ја користат најновата верзија од Android, односно 35%, додека кај земјите во развој процентот изнесува 12%

Извор: TechCrunch, OpenSignal