Можноста веб страните и веб апликациите да се инсталираат на компјутерот и да функционираат како изворна апликација е една од подобрите можности кај модерните интернет прелистувачи.
Овие апликации секако не можат да ги заменат „вистинските“ апликации, но за одредени работи за кои и нема апликација, веб верзијата е одлична алтернатива.
Firefox никогаш не ја доби оваа можност на десктоп, а истата беше откажана во тест фазата уште во 2021 година.
Сега, во најновите тест верзии од Firefox, повторно може да се најде можноста за инсталација на веб апликации, па конечно овој прелистувач ќе ја добие оваа можност.
Инсталацијата на веб страните како апликација се прави како и на било кој од другите прелистувачи, па секогаш кога некоја веб страна може да биде инсталирана, достапно ќе биде копче во лентата за адреси.
Оваа можност е најкорисна кога е достапна за сите веб страни, а не само за тие кои се направени како веб апликации, односно „PWA – Progressive Web Apps“.
Тоа што е поразлично кај имплементацијата на оваа функција кај Firefox во споредба со другите прелистувачи е што кога апликацијата е инсталирана, прозорот од истата повторно ги прикажува контролите и лентата за адреси од Firefox.
Тука малку се губи поентата на инсталација на веб апликациите, кои е замислено да се отворат во посебен прозор без никакви додатоци.
Вака корисниците нема да имаат некоја голема разлика од тоа да ја отворат само веб страната која сакаат или да додадат едноставна кратенка.
Како е да е, добро е што Firefox конечно повторно работи на оваа функција, па сигурно со тек на време ќе добие и одредени подобрувања.
