Ако сакате да почнете со вежбање, но не знаете што да правите, или можеби веќе сте навлезени во некоја рутина, но сакате да внесете новина, тогаш го имаме вистинското нешто за вас. Се вика MuscleWiki (https://musclewiki.org), бесплатна платформа која е неверојатно лесна за користење и дури може да ви помогне да си ги пресметате макронутриентите и калориите кои ги внесувате во текот на денот.
MuscleWiki е изработена од страна та w0ts0n, кој е исто така прилично активен и на Reddit (notanotherlifter https://www.reddit.com/user/notanotherlifter). Има неверојатно едноставен интерфејс, одличен за почетници.
На почетната страна ви се нуди интерактивна мапа преку која со еден клик можете да ја одберете конкретната мускулна група која сакате да ја вежбате и добивате листа на вежби, зависно од полот.
Секоја вежба е презентирана со помош на анимирани гифови и описи за истата. Искрено, на сајтот му фалат детали и библиотеката на вежби не е комплетна, но мора да му симнеме капа на дечкото за идејата.
Пред да кажете дека ова не е новитет (Bodybuilding.com веќе некое време користи слична мапа https://www.bodybuilding.com/exercises/ , меѓутоа таа не е интерактивна!), добрата страна на MuscleWiki е што е одлична за оние кои „овој пат сериозно сакаат да посветат на фитнесот“. Освен што можете лесно да си го пресметувате калорискиот внес и макронутриентите, тука имате и една многу поинтересна алатка наречена 1-rep max calculator, со која ќе ја одредите максималната тежина со која би можеле да изведете едно полно повторување, без да морате да тестирате во теретана (што може да биде погубно и за вашето тело и за суетата).
Заклучокот е дека на платформата ѝ фали уште многу работа, меѓутоа е одличен почеток и може да стане многу корисна алатка. А во меѓувреме вие можете да ја погледнете оваа листа на апликации со кои можете да си го подобрите животот https://www.smartportal.mk/soveti/podobri-si-go-zivotot-so-aplikacii-prv-del/ (во фитнес смисла, се разбира).
