Патување низ времето е една од најпроблематичните теми што филмовите упорно се обидуваат да ја обработат секоја година. Некогаш тоа испаѓа катастрофално (види: A Sound of Thunder). Некогаш испаѓа како нешто легендарно и епско (види: Back to the Future, Терминатор).
Публика за вакви филмови има секогаш. Затоа, Холивуд постојано го протнува патувањето низ времето во комедии (Black Knight, Austin Powers), драми, хорори и во речиси секој жанр на филмови.
Следи листа на некои од најдобрите филмови или серии чиј фокус е токму на time travel.
Predestination
Филм со Итан Хок. Според мене, еден од подобрите на оваа тема. Почнува како крими-трилер, но како што се движи дејствието, филмот се претвора во лавиринт од твистови кои се паметно обработени. Конечниот reveal е фантастичен. Браво за режисерите кои смислиле како совршено да ја адаптираат приказната „All you Zombies” на легендарниот Роберт А. Хајнлајн.
Primer (2004)
Пример заработи култен статус од неколку причини. Прво, снимен е за околу 10-15 илјади долари, што е само по себе неверојатно, од причина што изгледа како е да снимен со далеку поголем буџет. Речиси целата екипа на глумци се пријатели и роднини на режисерот на филмот (Shane Caruth), кој воедно ја игра и главната улога. Второ, приказната е bullet-proof. Група на пријатели работат на експериментални дизајни во гаража – и случајно откриваат како да патуваат низ времето. Режисерот не се обидувал да ја упрости приказната за да можат да ја разберат што повеќе луѓе. Затоа приказната е малку потешко да се следи, па вреди да се изгледа повеќе од еднаш.
Dark
Dark e една од најоригиналните серии што постојат. Ниту најголемите холивудски НФ филмови не можат да и парираат по сложеноста и повеќеслојната приказна и начинот на кој е раскажана. Првата сезона беше откровение на Нетфликс. Мене ми наликува на некоја мешавина од Чернобил и Стрејнџер Тингс. Иако очекував дека втората сезона ќе донесе повеќе одговори на прашања кои останаа по првата сезона, крајот отвори уште дузина прашања кои најверојатно ќе бидат одговорени во третата, и последна сезона од серијата. Ако не сте ја гледале, време е да почнете.