Фото: Innolith

Компанијата Innolith со седиште во Базел, Швајцарија, излезе со информација дека има постигнато огромен напредок во технологијата на батериите. Со нивната технологија, која е во процес на патентирање, литиум јонските батерии ќе може да имаат густина на енергијата до 4 пати поголема од сегашните батерии.

Густината на енергија која од оваа компанија ја најавуваат изнесува 1.000 ват часа на килограм, што е за дупло повеќе од најблиската технологија која е во фаза на развој и одобрена од страна на Министерството за енергија на САД.

За споредба, Tesla моментално во своите автомобили користи батерии со густина од 250 wh/kg, а работи на развој на батерија со 330 wh/kg.

Новата батерија, која Innolith ја развива во својата лабораторија во Германија, користи неоргански и незапалив електролит во литиум јонската батерија. Со тоа се зголемува и безбедноста на батеријата, а знаеме дека со денешните стандардни батерии, секогаш постои ризик од нивно запалување.

Овие батерии покрај нивниот капацитет, треба да имаат и подолг век на траење кој е за 10 до 100 пати поголем од денешните батерии. Ова секако е многу важно, а ќе се намали потребата од промена на батериите кај комерцијалните производи.

Доколку оваа батерија навистина е како што истакнуваат од компанијата, кога ќе се најде на пазарот, ќе може да овозможи електричните автомобили да поминат повеќе од 1.000 километри со едно полнење на батеријата.

Ова е доста голема разлика од сегашните електрични автомобили кои во просек можат да поминат околу 350 километри со едно полнење, а најдобрите резултати овозможуваат околу 600 километри.

Сепак, овие батерии не треба да се очекуваат баш веднаш на пазарот. Од компанијата имаат уште 3-5 години на развој додека батеријата биде понудена на заинтересираните компании.

Оставете коментар

This site uses Akismet to reduce spam. Learn how your comment data is processed.