Веќе слободно може да се каже трендот на ваков вид на уреди беше започнат од страна на Project Ara, проект на Motorola кој што остана во сопственост на Google по продажбата на оваа компанија на Lenovo. Се работи за уреди кои што овозможуваат промена на нивните компоненти, како што се процесорот, меморијата, батеријата и слично, преку нивно поставување на надворешната страна од уредот во форма на модули. Тие лесно се вадат, а замислата е посебно да се продаваат од страна на Google, но и други компании со што ќе се овозможи еден уред да има многу поголем век на траење, наместо денеска просечниот од 2 години.
Овој концепт треба повеќе да видиме како ќе изгледа практично од идната година за кога се најавени продажбите од повеќето производители кои што изработуваат вакви уреди. Во денешно време уредите се направени да корисниците ги менуваат што почесто. Тоа се гледа и од се помалиот период кој што се остава пред претставувањето на нови модели, кои што веќе не можат ни да бидат отворени за да можеме да им ја смениме барем батеријата.
Уште една компанија која што е дел од овој нов и интересен концепт е финската компанија Circular Devices. Пред некоја недела исто така можевме да прочитаме за уште една финска компанија која што работи на модуларниот уред Vsenn.
Уредот од Circular Devices е наречен PuzzlePhone и е поблизок до концептот со Vsenn отколку со Project Ara. Иако во основа со истиот концепт на менување на модули, уредите од финските производители овозможуваат промена на само 3 модули за разлика од многу помодуларниот Ara.
PuzzlePhone е направен да изгледа скоро исто како денешните паметни телефони, па од компанијата очекуваат полесно да биде прифатен од страна на корисниците кои што не се веднаш спремни да користат уред со целосно различен дизајн.
Трите модули од кој што е составен PuzzlePhone се неговиот екран на кој што се поставени и стерео звучници и копчињата за звук, главниот модул (мозок) во кој што се главните елементи за работа на уредот и батеријата.
Како и другите вакви уреди и PuzzlePhone ќе работи на Android или некоја променета верзија од овој отворен оперативен систем. Претставувањето на уредот за корисниците се очекува да биде некаде до идното лето, а цената треба да го стави во средната класа на уреди.
