Google оваа недела реши официјално да го претстави Project Wing, еден од повеќето проекти дел од Google X секторот задолжен за развивање на експериментални и напредни проекти. Иако можеше да се најде по некоја информација за проектот, сепак до сега немаше доволно детали, како и потврда воопшто за негово постоење.
Project Wing вклучува беспилотни летала, односно популарно наречени дронови, кои што имаат можност да пренесат одреден товар до саканата локација. Проектот е во развој веќе две години, меѓутоа не е ни блиску до комерцијална употреба, а тоа не се ни знае дели некогаш ќе се случи. Како што може да се види од видеото од Google, беспилотното летало е направено како еден вид на хибрид помеѓу хеликоптер и авион. Полетува вертикално, по што се насочува во правецот на летање како и секој друг авион.
Видеото е направено во Австралија, односно локација која што е избрана како погодна за тестирање на леталото. На него може да се види како фармер нарачува храна за неговите кучиња, по што дронот веднаш е натоварен и испратен на локацијата. Кога пристигнува на локацијата, почнува да лебди на одредена висина како хеликоптер, а товарот го спушта на земјата со кабел. Сензори оценуваат кога товарот е спуштен на земјата, по што кабелот се откачува од него и се враќа во дронот, кој што се враќа на неговата локација.
Project Wing може да се каже дека е конкуренција на Amazon, кои што оваа година претставија концепт за во иднина каде што пратките ќе ги доставуваат со беспилотни летала, односно дронови.
Извор: Wired, The Atlantic
