496E5537-4BE5-4E32-94E36E949DC104EA

За Hyperloop веќе сме пишувале повеќе пати. Се работи за проект за супербрз транспорт предложен пред некоја година од страна на Елон Маск (основачот на Tesla Motors, SpaceX и PayPal). Во меѓувреме, неколку здруженија ентузијастички се зафатија со работа да го остварат неговиот сон и тоа без негова директна помош.

Земајќи го ова предвид, извесно е дека Hyperloop наскоро ќе стане реалност (Hyperloop ONE планираат да ги поврзат Лос Анџелес и Лас Вегас до 2018-та година). Тоа веднаш го поставува главното прашање: дали Hyperloop ќе биде пријатен за нашите тела и дали ќе можеме да го поднесеме соодветно без да го извадиме ручекот од погрешното место?

Потенцијални проблеми по луѓето

Имено, кабините се проектирани да патуваат со максимална брзина од околу 1.200 км/ч. Тоа е околу 30% побрзо од најбрзите патнички авиони на денешницата! Меѓутоа, како што знаеме од часовите по физика во средно и основно, брзината не е главниот проблем тука – туку забрзувањето.

Имено, забрзувањето при комерцијалните летови е околу 0,3 g над нормалното 1 g (земјино забрзување). Така е направено за да биде подносливо за патниците кои не се тренирани пилоти. Сепак, дури и ваквото залетување понекогаш создава тешкотии кај нив.

За да се оддржи истото подносливо забрзување Hyperloop ќе треба да се залетува од нула до стандардната брзина за околу 2 минути. Секако, ако гледате филм или читате книга додека патувате ова воопшто нема да го приметите.

Уште еден проблем кој се појавува е вртењето на свиоци. Прекраток свиок – и ќе треба да се праќаат кабините на хемиско чистење. Затоа се предвидува свиоците во тубите да „траат“ барем околу 4 километри, доволно за вашиот желудник да не ви се налути.

Трет проблем кој се јавува е застанувањето во итни случаи. Со оглед на тоа што кабините најверојатно ќе бидат маглев (магнетско лебдење; maglev – magnetic levitation), во случај на нагло губење на струја тие ќе паднат на тлото и ќе почнат да кочат. Знаејќи го фактот што не постои тркало кое може да се врти и да ја потпира кабината на тлото при 1.000 км/ч, тоа би значело на прв поглед дека кабината ќе кочи со телото – и ќе предизвика огромно застанување, 10 пати посилно него судар на кола со брзина од 115 км/ч!

Ова секако е неиздржливо за нашето тело без разлика на системот на каиши и воздушни перничиња кои би се активирале во таквиот случај и веројатно ќе резултира во огромни внатрешни повреди, исчашување и кршење на коски или `рбет, внатрешно крварење, па дури и смрт. Мојата претпоставка е дека системот за заштита ќе биде базиран на резервни батерии кои ќе овозможат кабината да продолжи да лебди уште неколку минути додека кочи до застанување или некој вид на горилници на долната страна која, слично на полетувањето на ракета, ќе ја држат во вис за да не допре на шините.

zWqwgMD

Како и да е, кога ќе се решат овие инженерски проблеми нè чека револуција во јавниот транспорт кој на земја ќе биде неколкукратно побрз него авионите, како најбрз транспорт досега, а воедно и екстремно сигурен имајќи предвид дека ќе биде изолиран во засебни цевки кои ќе бидат заштитени од надворешни услови.

Дополнителни информации: Scientific American, Wired

Претходна статијаHP претстави нови гејмерски лаптоп и десктоп компјутери од Omen линијата
Следна статијаOppo претстави прототип паметен телефон со свитлив дисплеј