Како што сигурно знаете, а и 99% од вас веќе сигурно ја користите оваа можност, Facebook овозможува најавување на апликации и веб страни со вашата сметка од друштвената мрежа. Оваа можност ја нуди и Google, како и други компании, а истата е навистина корисна.
Наместо внесување на вашето име, презиме, имејл адреса, па и други информации, со најавувањето со Facebook, информациите стануваат достапни со еден клик.
Тука настанува и потенцијалниот проблем. Има апликации и веб страни кои се што бараат од Facebook да им го даде како информација е вашето име, презиме и имејл адреса и тука нема никаков проблем. Меѓутоа, некои од нив бараат и додатни работи како вашите лајкови, вашата листа со пријатели, а до пред 2014 и истите информации за вашите пријатели.
Токму на овој начин Cambridge Analytica им дојдено до огромната бројка од 87 милиони корисници.
Можеби бришењето на Facebook целосно е премногу драстичен потег, сепак мрежата може и „попаметно“ да се користи, па затоа еве ние само би предложиле проверка на сите апликации и веб страни на кои се имате најавено со вашата Facebook сметка.
По најновиот скандал, процесот на бришење на апликациите и веб страните е многу полесен, односно Facebook сега нуди можност да се селектираат сите кои би сакале да ги избришете и да ги избришете со еден клик групно.
За да дојдете до листата на сите апликации и веб страни со кои се имате најавено преку Facebook, следете ги следните едноставни чекори:
На десктоп
- Притиснете на стрелката надолу која се наоѓа на горниот десен дел од сината лента, веднаш до прашалник иконата
- На менито кое ќе се отвори притиснете на Settings (претпоследен избор)
- На новата страна притиснете на Apps and Websites од изборот на левата страна
- На овој дел, на прво место е листата која е наречена Logged in with Facebook
- Разгледајте ги сите апликации и би препорачале да ги избришете сите кои не ги користите веќе или не се ни сеќавате кои се.
На мобилен
- Притиснете на хамбургер менито, односно копчето со три хоризонтални линии на десниот дел од горната лента
- Притиснете на Settings & Privacy, па на Account Settings, а доколку ја немате најновата Facebook апликација, директно на Account Settings
- На новото мени притиснете на Apps, па на Logged in with Facebook
- Разгледајте ги сите апликации и би препорачале да ги избришете сите кои не ги користите веќе или не се ни сеќавате кои се.