hololens

Гигантот од Редмонд не воодушеви со својот уред за „Изменета Реалност“ HoloLens, кој може да прикаже холограми во просторот околу корисникот, но уредот е сѐ уште далеку од финалниот купувач. Затоа, Microsoft ја отвора Windows Holographic платформата и за уредите за „Виртуелна Реалност“, со цел подобро поврзување меѓу двете технологии.

На демото кое ги прикажа Microsoft, може да се види како двајца корисници имаат холограмска видео конференција – двајца со Microsoft HoloLens уред за изменета реалност и еден со HTC Vive уред за виртуелна реалност. Отсега, Microsoft Holographic платформата, која функционира заедно со Windows 10, ќе биде наменета и за едните и за другите уреди и ќе постави мост меѓу конкурентните технологии, односно како што ја нарекуваат од Microsoft, ќе биде своевидна „Измешана Реалност“. На овој начин, корисниците на различни технологии, ќе можат да работат на истите проблеми, како што е прикажано во видеото.

Покрај отворањето на платформата и на VR полето, Microsoft најави дека HoloLens уредот, кој засега е достапен само за дивелоперите, најверојатно нема да биде уредот кој на крај ќе го добијат корисниците. Имено, тој е наменет да биде само како патоказ за тоа како производителите на хардвер треба да ги развиваат своите уреди за изменета реалност, слично како што Surface серијата потегна цела плејада на таблети со дополнителна тастатура.

Според информации од Engadget, Microsoft веќе работи директно со HTC на ваков уред, кој пак одлично би го надополнил успешниот Vive во „виртуелната понуда“ на тајванскиот производител. Истите информации велат дека Microsoft соработува и со многу други производители, како Intel, AMD и Qualcomm за развој на чипови, односно Acer, ASUS, Dell, Falcon Northwest, HP, Lenovo и MSI за развој на целосни уреди.

Извор: Engadget, Trusted Reviews, ARS Technica

Претходна статијаViber за Windows 10 достапен за сите во бета верзија
Следна статијаПознатиот за Windows фановите Гејб Аул веќе не е главен на Insider програмата