Неодамна, Raspberry фондацијата го претстави првиот свој оперативен систем, кој е базиран на Linux и кој е наменет токму за работа со нивниот Raspberry Pi микро компјутер. Сепак, тие софтверот отсега ќе го направат достапен и за корисниците на Windows и Mac OS компјутери, кои ќе можат бесплатно да го инсталираат и да го тестираат.
Инсталацијата на Raspberry Pixel на Windows и Mac OS компјутерите е прилично лесна. Се што треба да направите е да ја симнете .iso датотеката и да ја изрежете на DVD или пак да ја ставите на бутабилно USB. Секако, во вашиот “BIOS” ќе треба да одберете компјутерот да бутира токму од тој диск, односно од DVD-то или USB-то. Потоа, оперативниот систем може да работи директно од тие медиуми, без потреба вистински да го инсталирате на вашиот компјутер.
Разлика меѓу двата медиуми сепак има – на DVD нема да може да го зачувате вашиот прогрес, односно тој ќе се зачувува само во рам меморијата, што значи дека со секое гаснење на компјутерот ќе ги загубите сите ново креирани податоци. Со USB стик нема да го имате овој проблем. Напомена – .iso датотеката има големина од 1,3 GB, па имајте го тоа на ум доколку сте ограничени со интернет.
Pixel оперативниот систем е инаку базиран на Debian 8.6 Jessie и истиот е прилично лесен, што значи дека може да функционира брзо и мазно и на послаби и постари компјутери. Всушност, затоа се вградува и на компаративно прилично слабиот Raspberry Pi компјутер.
Идејата на Raspberry со лансирањето на оперативниот систем за корисниците на Windows и Mac OS е да им покаже дека со купувањето на Raspberry Pi, тие можат да го користат како целосен десктоп компјутер со Linux, без некои поголеми ограничувања. Благодарение на ниската цена, Pi е особено интересен за оние кои сакаат да учат програмирање или да ги тестираат своите нови кодови.
Извор: Wired, ARS Technica, Raspberry
