Microsoft заврши навистина одлична работа со Windows 10 надградбите досега, но има неколку потези кои навистина ги нервираат корисниците. Таков е и овој последниот. Имено, Microsoft, односно нивниот директор на програмски менаџмент Џон Кејбл, изјави дека корисниците кои го немаат добиено Creators Update како автоматска надградба, препорачливо е да не го инсталираат мануелно на својот компјутер со Media Creation Tool.
Зошто нервира ова? Зошто вакви работи се кажуваат пред да биде достапна надградбата за симнување. Во одбрана на Microsoft, проблемите можеби се појавиле подоцна, но тоа не значи дека корисниците не треба навремено да бидат известени. Кејбл објасни дека Microsoft сега ќе ги блокира автоматските надградби за компјутери кои би можеле да имаат проблеми со Creators Update, иако мануелното инсталирање и натаму е возможно, нормално без препорака на Microsoft.
Причината како и секогаш се драјверите, во овој случај оние на Broadcom за Wi-Fi и Bluetooth. Според наодите на Microsoft, компјутерите со вакви чипови можат да имаат проблем со стабилноста и целосното функционирање на оперативниот систем. Веројатно е излишно да се каже, но доколку имате лаптоп или таблет со вакви Wi-Fi или Bluetooth чипови и сѐ уште ја немате добиено Creators Update надградбата, подобро е да не пробувате да ја инсталирате сами со Media Creation Tool.
Извор: Beta News, The Register, Windows Blog
