Со нов потег кој дефинитивно ќе го налути фановите на Windows Phone, Microsoft покажува дека веќе се откажува од својата мобилна палтформа и сите напори го вложува во апликации за другите две мобилни платформи – iOS и Android. Имено, прелистувачот Edge, кој досега беше ексклузивен за Windows 10 и Windows 10 Mobile, отсега ќе биде достапен за iPhone и Android смартфоните.
Овој потег од оние кои се малку повеќе упатени и беше очекуван, бидејќи е единствена шанса за вистински успех на прелистувачот, кој сѐ уште се бори со доминантниот Google Chrome на десктоп сцената. Всушност, за оние кои редовно користат Windows 10 компјутер или лаптоп, има многу смисла да го користат истиот прелистувач и на својот компјутер и на својот смартфон, односно таблет.
Microsoft Edge за iOS и Android ќе ги има истите можности како за Windows 10, односно Favorites, Reading List, New Tab Page и Reading View. Исто така, доколку почнете со сурфање на некој веб сајт или серија на сајтови во повеќе табови на вашиот преносен уред, потоа ќе може да ги отворите на вашиот компјутер и обратно.
Покрај Edge, со цел да понуди целосно “Microsoft” искуство на мобилните уреди, Microsoft го преименува Arrow Launcher за Android во Microsoft Launcher. На овој начин тие имаат и делумна контрола на интерфејсот на смартфоните со Android и можат да овозможат исто искуство на сите уреди, кое вклучува вести и новитети од денот, листа на најкористени апликации и можност за ставање на најблиските контакти на почетниот екран, нешто што беше можност и кај Windows 10 Mobile. Овој “Launcher” исто така овозможува лесно продолжување на работа на некој документ од Android смартфон на Windows 10 и обратно.
Засега и Microsoft Edge и Microsoft Launcher се во бета и се достапни за само одредена група на корисници, но наскоро веројатно ќе станат достапни и за поголем број на вљубеници во производите на Microsoft.
Извор: Android Authority, Windows Blog, The Verge
