Една од најпопуларните игри за оние кои сакаат чистокрвно возачко искуство на својот компјутер, вклучувајќи ме и мене (јеее, конечно стигнав и за тоа да пишувам), добива и своја VR верзија, која треба да Ви овозможи да се чувствувате како вистински да се наоѓате зад воланот на тркачки автомобил.
Project Cars е една од 30-те први игри кои ќе може да се играат на Oculus Rift и според тоа што може да се види на краткото видео, веројатно ќе треба сите да почнеме да собираме пари за играта и за VR очилата на Oculus.
Искуството е исклучително реално – кога ќе ја свртите главата, ќе можете да ги видите автомобилите до Вас, ќе можете да погледнете во ретровизорот, да го видите наредниот свиок од подобар агол… Како што се прави во вистинскиот свет.
Секако, тука ќе недостасуваат силите на гравитацијата кои се голем дел од возачкото уживање, но барем звукот и сликата ќе бидат блиску до реалноста, односно многу поблизу отколку што тоа го добиваме на нашите монитори, макар тие и биле заоблени или пак ги има три еден до друг. Со Oculus Rift и едно добро воланче, ваквите игри добиваат една целосно нова димензија.
Играта инаку носи “Intense” рејтинг, односно може дури и да е непријатна и зашеметувачка за оние кои прв пат користат VR очила, па ќе биде добро прво да поиграте неколку полесни игри пред тоа.
Компанијата која стои зад Project Cars, Slightly Mad Studios, засега нема коментар на прашањето дали VR верзијата на играта ќе биде достапна и за PlayStation VR и HTC Vive. Oculus Rift инаку работи само со PC и Xbox One.
Извор: Ubergizmo, SlashGear, Tech News Today
