Според информации од корејскиот портал The Bell, Samsung во изминатите година дена размислува за спојување на нивните две најдобри серии на смартфони. Причината за тоа е намалување на трошоците за развој, продажба, како и маркетинг на производите.
Идејата е да Galaxy S+ серијата, која веќе е доста слична со Note серијата, се спои во една, поточно да остане само S+ серијата на телефони. Главната разлика изминатите години помеѓу S+ и Note серијата, може да се каже дека е во главно S Pen пенкалцето, додека големината на екранот е скоро иста.
Според овие информации, најголемиот S модел би требало да ја замени потребата од Note телефони, а оваа серија идната година може да дојде со S Pen пенкалцето, па корисниците кои ги купуваат овие уреди во главно поради овој додаток, нема да останат без избор.
Она што останува само како прашање е изработката на уредите. Сепак Note серијата е замислена како бизнис серија, па овие уреди доаѓаат со нешто поквалитетна изработка од S серијата.
Како и да е, ако овие информации се покажат како точни, Galaxy Note 9 кој ќе биде претставен на 9 август, може да биде и последниот Note телефон од компанијата.
