Дека претставувањето на OnePlus 6 се ближи може да видиме од малите „тизери“ кои почна да ги пушта компанијата на друштвените мрежи. Првиот можевме да го видиме минатата недела, а се што ни покажа објавата е името на уредот и дека може да очекуваме наскоро негово претставување.
Повеќе информации добивме неколку дена подоцна преку блог објавата на директорот на компанијата, преку која потврди дека 6-ката ќе дојде со до 8 GB RAM меморија и 256 GB простор за складирање на податоци, како и најновиот од Qualcomm, Snapdragon 845 чипсет.
Најновиот „тизер“ исто така не ни открива ништо повеќе за уредот, освен можеби до некаде неговиот изглед. На сликата која е прилично затемнета, односно во сенка, се гледа постариот OnePlus модел, поставен врз 6-ката. Од тоа може да се претпостави дека задната страна на уредот нема да биде нешто посебно различна, а повеќето новини можеме да ги очекуваме на предната страна.
More immersion in a refined form factor. Are you ready for the #OnePlus6? pic.twitter.com/2HR2YE5Jb6
— OnePlus (@oneplus) April 11, 2018
Токму тоа и го говорат неофицијалните информации. Предната страна ќе биде направена во сега веќе стандардниот стил на минимални рамки околу екранот, а во случајот на OnePlus 6, ќе биде присутен и исечокот на горниот дел од екранот.
Официјалната дата кога треба да биде претставен OnePlus 6 се’ уште не е објавена, а се верува дека тоа ќе биде некаде на почетокот од идниот месец. Со оглед на малите информации што ги објавуваат од компанијата, дефинитивно може да заклучиме дека датата е блиску.