Moto G од Motorola е една од најпопуларните серии на паметни телефони. Се работи за телефони од средната класа, кои што доаѓаат со солидни перформанси и одлична цена.
Нова, односно трета генерација од Moto G серијата треба да биде претставена идната недела, поточно на 28 јули. Како и обично, можевме да прочитаме повеќе неофицијални информации и да претпоставиме кои би биле спецификациите на новиот телефон. Се разбира, искуството има покажано дека неофицијалните информации иако често точни, не може да се сметаат како 100% сигурни, но може да се земат како еден показател за што може да се очекува.
Оваа недела информации за спецификациите на Moto G се објавени на една шведска продавница, очигледно по грешка со оглед на тоа што се чека претставувањето на телефонот на официјалниот настан. Се работи за продавницата Digitech, а според нивната објава Moto G трета генерација ќе ги има следните карактеристики:
- 5 инчен екран со Full HD резолуција
- Snapdragon 610 чипсет со осум јадрен 1,7 GHz процесор и Adreno 405 графички процесор
- 2 GB RAM меморија
- 8 GB меморија за складирање со поддршка за microSD картичка до 128 GB
- Камера со 13 мегапиксели
Цената по која што е најавено дека ќе се продава уредот изнесува 235 евра, меѓутоа како и спецификациите, ќе дознаеме што се е точно идната недела.
Извор: TechnoBuffalo, PhoneArena, DroidLife