Акционите камери се мошне популарни кај зависниците од адреналин и кај спортистите, но и воопшто кај пошироката публика, благодарение на нивните широки можности. Новата акциона камера на Kyocera е особено интересна, бидејќи е вградена во нов цврст модел на паметен телефон, кој може да издржи скоро се што ќе му приредите на вашите екстремни активности.
Да, како и сите подобри акциони камери и DuraForce Pro е исклучително отпорен. Имено, тој има IP68 сертификација за водоотпорност до 2 метри длабочина максимум 30 минути, но многу поважно, воена спецификација 810G за отпорност на шокови, вибрации, прашина, екстремни температури и температурни шокови, соларна радијација, низок притисок, екстремно влажен воздух и „замрзнат дожд“.
Ова е дефинитивно смартфон кој ќе биде тешко да го уништите, што го прави перфектен за втората негова намена – да биде акциона камера. За тоа ќе биде задолжена задната камера, со исклучително широка леќа од 135 степени, која може да снима и Full HD видео. Ова ја става рамо до рамо со акционите камери од средната класа – за натпреварување со најдобрите DuraForce Pro ќе мора да снима и Ultra HD видео. Kyocera сепак има вградено неколку различни софтверски подобрувања за снимање под вода, Time Lapse, забавена снимка итн, a ќе има и додаток со кој телефонот ќе може да се стави на сите стандардни држачи за акциони камери.
Оваа камера е придружена од уште една со сензор со 13 мегапиксели, која има нормален агол и е задолжена за стандардните фотографии за Instagram, додека за селфи фановите е вградена и предна камера од 5 мегапиксели. Да, овде има камера за апсолутно секого – и за спортистите и за фотографите и за селфи зависниците.
Сета оваа отпорност на елементите и можност за снимање акциони видеа е вградена во прилично добар Android Marshmallow 6.0 паметен телефон, со 5 инчен Full HD дисплеј, Snapragon 617 процесор и 2 GB рам, што значи дека може да очекувате респектабилни перформанси. Батеријата има солиден капацитет од 3.240 mAh со Qualcomm 2.0 брзо полнење и безжично полнење, додека во телефонот е вграден простор од 32 GB за складирање податоци.
Kyocera ги нагласува и аудио перформансите – напред поставените стерео звучници можат да извадат звук со јачина од преку 100 децибели (импресивно), а во копчето за отклучување тие имаат вграден и читач за отпечатоци на прстите. Дефинитивно со овој телефон не се губи на ниту една функционалност.
Она што сѐ уште не ни е познато е цената на овој телефон, но очекувајте да биде малку повисока – цврстите и отпорни телефони секогаш чинеле премиум над обичните (како Samsung S7 Active и CAT S50c), а овој дури има и функционална акциона камера во него.
Извор: GSMArena, Android Police, Digital Trends