За да поседувате смартфон со заоблени страни и многу мала рамка во долниот и горниот дел, треба да издвоите прилично многу пари, односно да купите Samsung Galaxy S8, Galaxy S8+ или пак новиот Galaxy Note 8.
Сепак, тоа ќе се промени наскоро, бидејќи Samsung планира да ги пресели ваквите дисплеи и во поевтината “Galaxy A” серија на паметни телефони од наредната година.
Ова и се очекуваше, бидејќи Samsung веќе неколку години по ред ги префрла најдобрите карактеристики на “Galaxy S” серијата во “Galaxy A” серијата. Сепак, една технологија сѐ уште нема стигнато до ниту еден “Galaxy A” смартфон, а тоа е “Edge” дисплејот, па би било прилично голем скок Samsung веднаш да се префрли на “Infinity Display”.
Како и да е, корејскиот гигант би можел да ги дизајнира тие модели со многу мала рамка во горниот и долниот дел и без воопшто рамка од страна, но и без “Edge” закривениот дисплеј.
Засега нема многу дополнителни информации за тоа каков потег Samsung навистина ќе повлече, односно сето ова се шпекулации покренати од твитер профилот @mmddj_china од Кина, кој досега имаше неколку успешни најави за нови модели. Независно од тоа, јас би им дал тежина на овие информации, бидејќи со таков потег Samsung ќе го одбие нападот на голем број на кинески модели од високата класа, кои имаат иста цена како “Galaxy A” серијата, но подобри спецификации. “Infinity Display” дефинитивно би помогнал да се врати сјајот на овие модели наспроти конкуренцијата, независно од спецификациите.
Извор: Techno Buffalo, Tech Radar, Gizbot
