Кинескиот производител Huawei не само што жестоко им конкурира на Samsung и Apple во борбата во високата класа, туку има модели кои во многу можности ги надминуваат етаблираните конкуренти. Honor Magic е еден таков модел, кој има моќни спецификации и исклучителен изглед, но уште поважно, софтвер со „вештачка интелигенција“.
Софтверот се вика Honor Magic Live OS и истиот е базиран на Android Marshmallow 6.0. Тој цело време следи што правите на вашиот телефон и може да дава најразлични препораки. На пример, доколку пишувате со некој пријател за филмови на некој чет клиент, тој може да ви препорача нов филм, односно доколку возите со автомобилот, да ве предупреди да го ставите телефонот во посебен “Driving Mode”.
Honor Magic Live OS има и неколку функционалности на стандардниот Android, односно Google Now, како на пример да ви даде информација за тоа што во моментот го гледате на дисплејот. Сепак, длабоките можности на софтверот на Huawei се евидентни во други елементи, како на пример кога ќе нарачате такси. Тогаш, таблицата на таксито кое сте го нарачале, ќе стои на вашиот “Lock Screen”.
Не помалку интересни, иако веќе видени, се WiseScreen Sensor Magic, кој автоматски го вклучува дисплејот кога ќе го извадите од џебот или пак FaceCode Intelligent Recognition кој ги покажува пораките само доколку телефонот го види вашето лице.
И заедно со сите овие можности, Honor Magic е и еден исклучително дизајниран телефон. Тој има 5,09 инчен Quad HD дисплеј со блага закривеност на страните како кај Edge моделите на Samsung, прилично моќен Kirin 950 чип од високата класа, 4 GB рам меморија и 64 GB простор.
Камерите се исти како кај неколку други модели на Huawei – задната е двојна со 12 мегапиксели (едниот сензор е црно бел) но без Leica леќа, додека предната камера има солидни 8 мегапиксели. Батеријата пак има 2.900 mAh, што можеби не делува како многу, но затоа овој модел има брзо полнење од 70% за само 40 минути.
Huawei Honor Magic во Кина ќе чини 535 долари, цена која би можела да биде и малку повисока кога ќе биде достапен на останатите пазари. Ова не е толку поволно како што беше случај порано со моделите на Huawei, но и натаму поевтино од конкурентните модели на конкуренцијата.
Извор: Android Central, Engadget, GSMArena
