СКОПЈЕ, 10.10.2017: Светската недела на вселената оваа година ќе биде финализирана со јавна дебата, во вторник, на 10 октомври, во 10 часот, во „МКЦ – Џебно кино“ на тема загадување на воздухот.
Оваа јавна дискусија е поддржана од програмата NASA Datanauts, во склоп на open.NASA, која претставува соработка со неколу индивидуалци од целиот свет со цел подобро искористување и промоција на отворените податоци за генерирање иновации и решавање глобални проблеми. Со нивна помош оваа дебата ќе биде промовирана на глобално ниво со цел да се посочи како македонските граѓани се здружуваат и ја користат технологијата за решавање еден ваков сериозен проблем.
Од организацијата велат дека оваа дебата ќе се фокусира на иницијатива за поголема соработка помеѓу државните институции, невладините организации и бизнис-секторот за креирање долгорочни мерки за справување со загадувањето на воздухот преку: искористување на отворените податоци и транспарентност, креирање иновативни проекти од заеднички приватен и јавен карактер, прибирање креативни идеи од граѓаните, невладините организации и бизнис-секторот како и нивно активно вклучување.
На дебатата официјално и првпат во јавноста ќе се прикажат споредбени податоци од апликацијата „Мој воздух“ за бројот на деновите секоја година (во периодот јануари 2015 до септември 2017) во кои ПМ10-дневниот лимит е надминат.
Дебатата ќе ја води Огнен Јанески, а како панелисти ќе говорат Јани Макрадули, заменик-министер за животна средина и просторно планирање, Ели Пешева, претставник на коалицијата О2, Хајан Селмани, основач на компанијата Хаселт и Јасмина Белчовска Тасевска од канцеларијата на УНДП во Македонија.