thinkpad-x1-carbon-hero-img-2

Доколку неодамна купивте компјутер со најновата генерација на процесори од Intel, наречени Skylake, а сакате на него да инсталирате Windows 7 и 8.1, подгответе се за непријатно изненадување – тие два оперативни системи ќе бидат поддржани само уште 18 месеци на овие чипови.

Во превод, за да имате континуирана поддршка, ќе мора да инсталирате Windows 10 оперативен систем. Одлуката на Microsoft да не ги поддржува постарите оперативни системи кај најновите чипови за некои е скандалозна, но да бидеме реални е многу природна – најновиот хардвер секогаш ќе работи најдобро со најнов софтвер.

На пример, новите Skylake процесори имаат некои нови инструкции, како на пример автономен менаџмент на потрошувачката на енергија, кои за да функционираат оптимално, треба да имате инсталирано Windows 10. Да, со надградба овие функции може да се добијат и кај Windows 7 и 8.1, но тоа одзема премногу време, а се коси и со целта на Microsoft за 1 милијарда Windows 10 уреди.

Ова сигурно нема да се покаже како проблем за приватните корисници, но за многу компании кои буквално имаат вложено илјадници евра за компјутери со Skylake, но се уште имаат постара верзија на Windows, може да значи дека ќе мора да се префрлат на 10-ката, или да го менуваат хардверот.

Засега нема информација за серверските верзии на Windows, но има можност истата полиса за поддршка да важи и таму, односно да се побара од компаниите префрлање на Server 2016 доколку сакаат да го користат најновиот хардвер.

Microsoft објави неколку лаптоп компјутери кои ќе бидат поддржани во наредните 18 месеци, а ќе можат да се нарачаат со Windows 7 и 8.1 и кои ќе треба да го олеснат преминувањето кон Windows 10: Dell Latitude 12, Dell Latitude 13 7000 Ultrabook, Dell XPS 13, HP EliteBook Folio, HP EliteBook 1040 G3, Lenovo ThinkPad T460s, Lenovo ThinkPad X1 Carbon, и Lenovo ThinkPad P70.

Покрај сето ова, сите идни процесори на Intel, почнувајќи од наредната генерација Kaby Lake, како и новите Bristol Ridge на AMD, ќе бидат поддржани исклучиво од Windows 10. Во превод, за користење на најновиот хардвер, ќе ви треба најновиот оперативен систем, барем ако сакате да користите Windows.

Што да направите доколку денес сакате да купите нов компјутер, а мора да користите постар Windows поради некој софтвер или пак зошто така сакате? Моја препорака е да земете компјутер со Broadwell процесор од претходната генерација, кој реално нема да заостанува премногу во однос на Skylake процесорите, односно разликите во перформансите се занемарливо мали.

Извор: ARSTechnica, PC World, Windows Blog

Претходна статијаNitro Duo – Уред со Windows и Android и два различни процесори
Следна статијаMicrosoft работи на видео повици со „холограми“