Пионерот кај паметните часовници, Pebble, го претстави својот прв кружен часовник. Паметните часовници земаат се поголемо учество на пазарот, а кружните уреди се најпопуларни, особено во Android Wear еко системот, па беше само прашање на време кога и Pebble ќе го стори тоа.
Часовникот има прилично класичен дизајн и на прв поглед дури и не се забележува дека е „паметен“, што за многумина е и предност. Димензиите му се помали во однос на конкурентите – дебелината е само 7,5 милиметри, додека целиот часовник тежи само 28 грама, што веројатно го прави прилично пријатен за носење.
Часовникот е достапен со неколку различни каишчиња, изработени од кожа и челик, со ширина од 14, односно 20 милиметри, а достапни се и три бои на телото – црна, сребрена и розе – златна.
Како и секој модел на брендот и овој има e-ink дисплеј во боја, кој троши многу помалку енергија во однос на LCD екраните и кој може да биде цело време вклучен, што значи дека нема да се гаси доколку го тргнете погледот од него.
Pebble ветува дека батеријата ќе трае два дена, односно еден ден со само 15 минути полнење – подобри резултати од оние на конкуренцијата со LCD екрани, но послаби од досегашните модели на брендот.
Pebble Time Round може да работи со Android и iOS, како и преку некои неофицијални апликации со Windows Phone, што го прави единствен меѓу паметните часовници. Цената на овој модел изнесува 249 долари, а во Европа може да го очекуваме дури наредната година.
Извор: The Next Web, Engadget