Покрај многуте bluetooth звучници на пазарот, производителите се принудени да прават производи што се разликуваат од генеричните со цел да се зголеми продажбата. Sony поставува добар пример за тоа со нивниот паметен bluetooth звучник што може да ве следи наоколу.
Имено, дизајнот е елегантен и интересен, двете полусфери што се одвојуваат од горниот дел му даваат изглед на паметниот звучник како футуристички аларм за будење. Полусферите имаат и свое светло кое менува бои.
Од функционален аспект, покрај тоа што звучникот е способен да ве следи, способен е и да претвара текст во говор, со тоа што може да ви чита временски прогнози, датуми и слични кратки информации. Дополнително, звучникот прима и говорни наредби и може да работи синхронизирано со вашиот телефон така што можете да му давате говорни команди на вашиот телефон преку самиот bluetooth звучник.
Нормално, вибрира на повик, па можете да примате повици преку него, а има и функција како паметен аларм, и се активира многу лесно. Само допрете го со вашиот уред кој има NFC функционалност.
Реално, за уред од овој калибар не може да се најдат многу замерки – неколку интересни технологии сместени во еден уред кој во меѓувреме изгледа супер. Освен цената, секако. „Smart Bluetooth Speaker BSP60“ на Sony ќе ве чини „скромни“ 299 евра, а ќе биде достапен во вториот квартал годинава. Дали вреди за таа сума на пари, оставаме на вас да процените.
