Microsoft оваа недела го претстави Microsoft Band и со тоа се приклучи на овој популарен дел од пазарот на паметни уреди за носење. Microsoft Band е паметен часовник во форма на алка, односно сличен на Samsung Gear Fit, на пример. Наменет е првенствено за следење на вашите активности и не вклучува многу можности за поврзување и работење со вашиот паметен телефон, нешто што е карактеристично за веќе класичните паметени часовници.
Дека Microsoft ќе претстави ваков уред можевме да прочитаме изминатото лето, а информациите говореа дека уредот ќе биде во фитнес категоријата и ќе вклучува 11 сензори. Како и обично, информациите се покажаа како прилично точни. Microsoft Band доаѓа со TFT екран на допир со димензии од 11mm x 33mm. Работи на ARM Cortex M4 MCU процесорот и вклучува 64MB внатрешна меморија. Доаѓа со 9 сензори од кои што:
- Оптички сензор за пулс
- 3 оскин акцелерометар
- Жироскоп
- GPS
- Сензор за светлина
- Сензор за температура на кожата
- Сензор за UV светлина
- Капацитивен сензор
- Галвански сензор за кожата
Часовникот треба да издржи до 48 часа на користење, по што треба да се наполни, процес кој што трае околу час и половина. Цената по која што ќе се продава Microsoft Band изнесува 200 долари и како што би очекувале ќе биде достапен само за американските корисници преку Microsoft продавниците, локални и онлајн.
Како што е карактеристично за ваквите уреди, Microsoft Band ги следи вашите чекори, пулс, потрошени калории и слично. Она што не е стандардно кај овој уред е можноста за следење на спиењето, како и UV зрачењето во моментот.
Покрај претставувањето на овој уред, Microsoft по концептот кој што го користат Google и Apple, претстави посебен cloud сервис кој што треба да ги сумира и прикажува сите информации собрани од уредот, како и други уреди. Сервисот е наречен Microsoft Health и за истиот е достапна апликација за сите популарни платформи, односно Windows Phone, Android и iOS. Апликацијата се поврзува со Microsoft Band, кој што може да работи и со други достапни фитнес апликации и ги прикажува информациите собрани од нив.
Часовникот покрај фитнес функциите, ќе вклучува и неколку функции карактеристични за обичните паметни часовници, па ќе може да ги прикажува пристигнатите SMS пораки, повици и слично, меѓутоа нема да вклучува можност за правење на разговори.
Извор: PCWorld, Re/Code, Microsoft Band