Многу корисници сѐ уште се загрижени за својата приватност на уредите кои ги поседуваат, а еден од оперативните за кои се дига најмногу галама кога е во прашање приватноста и безбедноста е Windows 10. Затоа, Microsoft редовно го надградува својот оперативен систем, а сега објави и неколку правила со кои ќе се осигурате дека ќе бидете целосно безбедни кога ќе пристапувате на интернет мрежата.

Лошата страна на овие правила е што вклучуваат нов хардвер. Поточно, за да бидете најдобро обезбедени, според Microsoft треба да имате Intel процесор од најновата седма генерација (Core i3, i5, i7 или M3), најнов Xeon процесор или пак најнови Atom, Celeron и Pentium процесори, односно новите Ryzen чипови на AMD и 8 GB рам меморија. Ова драматично го намалува бројот на компјутери кои ги поддржуваат најновите стандарди за безбедност на Microsoft, каде не спаѓаат дури ниту некои многу скапи машини.

Да, ова значи дека компјутер со процесор од шестата генерација, кој можеби го купивте и денес, нема целосно да ги задоволи побарувањата на Microsoft. Воедно, сите чипови ќе мора да работат на 64-битна архитектура, потребно за “Virtualization-based Security”. Причината за ова е што голем дел на сервиси вградени во оперативниот систем наменети за заштита од напади се базираат токму на “Virtualization-based Security”, а тоа се Windows Defender Credential Guard, Windows Defender Device Guard и Hypervisor-Enforced Code Integrity (HVCI).

Потоа, за поддршка на екстензии од виртуелни машини со SLAT, машината треба да има и Intel Vt-X со Extended Page Tablets или пак AMD со Rapid Virtualization Indexing (RVI). На крај, компјутерот ќе треба да има Trusted Platform Module version 2.0 и Intel VT-d, AMD-Vi или ARM64 SMMUs за IOMMU виртуелизација и на крај, компјутерот треба да поддржува верифицирана платформа за бутирање, односно Intel Boot Guard in Verified Boot mode или AMD Hardware Verified Boot.

Сите овие спецификации се премногу за секојдневниот купувач, но за среќа може да се најдат на листата со спецификации на најновите чипови на Intel, AMD и ARM (наскоро Windows 10 ќе се испорачува и на ARM). Исто така, има и евтини лаптопи со чипови од најновата генерација на Intel и AMD кои ги поддржуваат сите овие стандарди, што значи дека не мора да потрошите премногу пари за да бидете безбедни, но од друга страна значи дека и ако потрошите, не можете да бидете сигурни дека ќе бидете безбедни, односно ако скапиот компјутер кој го земавте нема процесор од најновата генерација.

Извор: ZDNet, Bleeping Computer, Neowin

Претходна статијаApple работи на очила за проширена реалност, кои би пристигнале во 2019 година
Следна статијаКако Instagram Stories сега може да се објават и постари слики