CES саемот за технологија дефинитивно никогаш не разочарува и е местото каде што ги гледаме некои од најголемите новитети од компаниите. За време на CES 2023, кој се одржува оваа недела, познатата француска компанија Withings, која е најпозната по своите фитнес производи како паметни ваги, претстави мал уред кој треба да овозможи тестирање на урината во домашни услови.
U-Scan е името на новиот уред, кој е направен во мала кружна форма и е замислен да се постави во самиот тоалет, исто како што се поставуваат освежувачите. Се поставува така да корисниците го „погодат“ за време на извршувањето на својата физиолошка потреба, а на долната страна има мал отвор од каде се собира примерок.
Тестирањето се прави преку предизвикување на хемиска реакција и добивање на резултат преку промена на бојата на специјална хартија која е поставена во уредот. Кертриџите потребно е да се заменат на секои три месеци, а тоа е времето и за кое се очекува да издржи батеријата.
Withings веќе имаат започнато соработка со два европски медицински центри со кои U-Scan треба да се користи за откривање на одредени болести, како и канцер на мочниот меур.
За почеток, а и наједноставно да се добие дозвола за домашните корисници, достапни ќе бидат уредите U-Scan Cycle Sync и U-Scan Nutri Balance. Со овие уреди жените ќе можат да го следат својот месечен циклус, додека со вториот уред ќе може да се следи квалитетот на исхраната и хидратацијата.
Информациите од било кој од уредите ќе се синхронизира со мобилна апликација, каде што ќе можат да се добијат потребните информации. Уредите е планирано да се продаваат по цена од околу 500 евра, за почеток во Европа.