Има уште доволно месеци до претставувањето на наредната генерација од Galaxy Z серијата на уреди, а истото обично се случува при крајот на јули или почетокот на август.
Стандардно, SmartPrix во соработка со @evleaks објавија генерирани слики направени врз основа на информациите кои се достапни досега за Galaxy Z Fold6 уредот.
Од тоа што може да се види, Galaxy Z Fold6 нема да изгледа целосно исто со претходните генерации, па Samsung се има одлучено за мал редизајн. Овој редизајн е во правец на дизајнот на S24 серијата, па може да се забележат доста рамни делови од страните, како и доста намалени заоблени делови околу екранот.
Дефинитивно може да се каже дека иако мала, оваа промена прави да Galaxy Z Fold серијата е доволно освежена и изгледа доста подобро.
Од SmartPrix истакнуваат дека може да се очекува и мала промена кај димензиите, па уредот треба да биде малку понизок и малку поширок. Сепак, од тоа што може да се види, Samsung продолжува да го користи нивниот формат за овој вид на уреди, кој е доста „тесен“ и не овозможува баш класично смартфон искуство кога е затворен.
Покрај дебелината на уредот кога е затворен и линијата на местото на превиткување на екранот, една од поголемите маани на Galaxy Z Fold е баш овој негов формат. Конкурентите веќе претставуваат пошироки уреди кои им овозможуваат на корисниците вистинска алтернатива на нивниот класичен смартфон.
