iPad Pro може да се каже дека се едни од подобро дизајнираните таблет компјутери на пазарот, а со вклучувањето на М серијата на чипови од Apple, тие се можеби и најдобри кога се во прашање перформансите. Сепак, дизајнот на iPad Pro не е променет веќе неколку години, што значи дека време е да се очекува нешто на тој план од Apple.
Според Марк Гурман од Bloomberg, кој е еден од најмеродавните за вакви информации, промена во дизајнот не треба да се очекува ниту оваа година, а плановите се да се пушти целосно нов iPad Pro идната година.
Тоа што се очекува за идната година е промена на дизајнот на iPad Pro, но не е познато во кој правец, освен тоа дека задната страна можно е да биде изработена од стакло, наместо алуминиум.
Додатно, веќе неколку пати се најавува дека од идната година Apple за првпат ќе почне да користи OLED екрани кај iPad Pro, а верувањата се дека тоа може да биде пренесено и кај MacBook компјутерите.
Интересно ќе биде да видиме во кој правец ќе одат работите зошто покрај гласините за користење на OLED екрани, веќе има гласини дека Apple развива и ќе користи сопствен MicroLED екран.
За iPad Pro исто така се најавува и можноста да добие MagSafe како кај iPhone со што ќе се отвори можноста за разни интересни и корисни додатоци.
Има уште доста време до потенцијалното претставување на нова генерација од iPad Pro идната пролет, па во меѓувреме ќе излезат уште многу нови гласини.
