Не знам за вас, но за мене ова откритие е едно од најдобрите за кои имам прочитано изминатиот период. Поточно, двајца истражувачи од Бостонскиот Универзитет, професор и докторант, имаат развиено материјал којшто успешно ги блокира звуците, до 94% од нив.

Материјали кои овозможуваат добра звучна изолација секако постојат, но она што го прави овој материјал различен е тоа што тој во исто време овозможува проток на воздух и светлина. Тоа значи дека овој материјал отвора многу нови можности каде ќе може да се примени звучна изолација, места каде досега не било баш можно.

Материјалот, односно како што е наречен, акустичен мета-материјал, е направен врз основа на математички пресметки од страна на истражувачите. За разлика од други материјали со ваква намена, овој ги враќа звучните бранови назад од каде што доаѓаат, наместо да ги апсорбира или нешто слично.

Математичките пресметки се основата за тоа каква форма треба да има материјалот со цел да ја има потребната способност. Неговото креирање е направено со помош на 3D принтери, што ја прави работата уште поедноставна.

Овој материјал е направен во форма на прстен, што значи дека не ја затвора целосно просторијата каде што треба да биде „спречен“ звукот. Формата е таа која ги враќа звучните бранови, а истражувачите тоа го имаат демонстрирано преку негово поставување на крајот од цевка низ која се пушта звук од звучник. Резултатот од експериментот можете да го видите на следното видео.

Примените на овој нов материјал се навистина корисни. Како примери може да се истакнат дроновите, а секако уште поинтересна би била примената кај моторите од авионите. Друг пример е изолацијата на населени места од околниот сообраќај, а јас секако морам да ја споменам и изолацијата помеѓу становите во зградите.  

ИЗВОРEurekAlert
ИЗВОР 2Fast Company
Претходна статијаВрати се во игра! – Од септември Бизнис 3х3 Баскет
Следна статијаSamsung вечер во 22:00 ги претставува новите Galaxy Note10 уреди, а еве ги и последните неофицијални информации поврзани со нив
Својот интерес во областа на паметната технологија го развива одамна како хоби кое што прераснува во нешто повеќе, па резултатот на тоа е и развојот на овој портал. Сака да ги следи сите новини поврзани со оперативните системи, апликациите, мобилните телефони, но и интересните научни и вселенски истражувања.