Повеќе од седум години по претставувањето на HDMI 2.1 стандардот, кој донесе доста потребни и барани карактеристики, HDMI Forum го најави претставувањето на наредната верзија од стандардот.
Иако не е директно најавено дека се работи за HDMI 2.2, се верува дека ова ќе биде верзијата која ќе биде претставена. Претставувањето се очекува да се случи на почетокот од идниот месец, односно во рамките на CES 2025 саемот за технологија.
Повеќето информации за што точно ќе донесе новиот стандард ќе ги дознаеме идниот месец. Засега само се очекуваат стандардните подобрувања, односно поддршка за повисоки резолуции и стапки на освежување, како и поголема брзина на пренос на податоци.
Се верува дека големи се шансите дека за искористување на поголемиот дел од новините, ќе мора да се користи нов кабел, но секако, промената на каблите нема да биде нешто што повеќето корисници ќе мора да го направат.
Дел од корисниците се надеваат на целосна промена на кабелот и користење на USB-C приклучок, но мислам дека мали се шансите за ваква драстична промена.
