Windows 10 таблет/лаптоп лудилото не престанува – јапонскиот производител Toshiba спреми конкурент на Surface Pro 4 и Surface 3, кој е исклучително тенок и лесен, а доаѓа со вградена тастатура и дигитално пенкалце.
Димензиите се навистина импресивни. Дебелината изнесува само 6,9 милиметри, што е навистина тенко за еден Windows 10 таблет, дури и потенко од многу Android таблети и рамо до рамо со iPad Pro. Уредот тежи и само 580 грама, што за таблет со дисплеј од 12 инчи е во најмала рака импресивно. За ниската маса заслужна е изработката од алуминиум и карбон фибер, кои се воедно и прилично цврсти материјали.
Покрај минијатурните димензии, dynaPad вкллучува и дисплеј со прилично висока резолуција од 1920х1280 пиксели, како и Wacom пенкалце кое препознава 2048 зони на притисок, двојно повеќе од Surface Pro 4, што би требало да придонесе за уште пореално искуство при пишувањето.
Според известувањата од оние кои имаа шанса да ја пробаат тастатурата со тачпад на CES во Лас Вегас, каде официјално беше претставен dynaPad, истата е прилично блиска до оние што ги користиме на лаптопите, што е уште една предност за новиот „2 во 1“ уред на Toshiba.
Онаму каде новиот dynaPad на Toshiba не е особено импресивен се перформансите – во внатрешноста е вграден Intel Atom процесор, од кој не може да се очекуваат којзнае колку моќни перформанси – сепак се работи за мобилен чип.
Тука е помогнат од 4 GB рам меморија, што би требало да е доволно за основните потреби, како и 64 GB вграден простор за складирање податоци, кој може да се прошири со micro SD картичка. На таблетот инаку има две USB 2.0 порти и micro HDMI слот, како и задна камера со 8 мегапиксели, односно предна со 2 мегапиксели.
Сите овие спецификации секако дека не се конкурентни на новиот Surface Pro 4, кој има процесори од Core серијата, па аналогно на тоа и цената е малку пониска – 650 долари за почетниот модел. Вистински конкурент на dynaPad е Surface 3, малку подзаборавениот таблет со Intel Atom процесор на Microsoft, кој стартува од 500 долари за модел со 2 GB рам и без тастатура, која чини плус 130 долари.
Според тоа, за оние што сакаат преносливо решение, кое ќе може да се користи и како лаптоп и таблет за цртање, новиот dynaPad е веројатно е еден од најдобрите уреди во моментов на пазарот. Веројатно се додека не се појави новиот Surface 4 на Microsoft.
Извор: Engadget, Windows Central, Laptop Mag, Toshiba
