Настанот Samsung Galaxy Unpacked, на кој ќе бидат претставени новите модели на корејскиот производител, ќе се одржи на 13-ти Август. На настанот веројатно ќе биде претставен новиот Galaxy Note 5, а се очекува и претставување на Galaxy S6 Edge Plus.
Всушност, самата слика со која е најавен настанот на официјалната страна на Samsung најавува телефон со заоблен екран, односно Edge верзиите на Samsung. Затоа, не можеме со сигурност да потврдиме дека на настанот ќе биде претставен и новиот Note 5, бидејќи досега тоа се случуваше во Септември секоја година, но ќе држиме стегнати палци.
Според информациите кои ги имаме досега, Galaxy Note 5 треба да биде вистинска ѕверка во поглед на перформансите. Ќе го има најновиот Exynos 7422 процесор на Samsung, кој треба да направи уште еден исчекор пред конкуренцијата, а ќе има и 4 GB рам меморија и огромна батерија од 4100 mAh. Единствено не е сигурно колкав ќе биде екранот – некои извори најавуваат 5,7, додека некои 6 инчи.
Од друга страна, Galaxy S6 Edge Plus ќе биде поголема варијанта на S6 Edge, со 5,5 инчен екран, но со послаб, Snapdragon 808 процесор со 3 GB рам меморија. Нормално, главна одлика на овој модел ќе биде закривувањето на екранот на страните, кој изгледа навистина интересно. И двата модели ќе имаат камери од 18 мегапиксели, со можност за снимање на Ultra HD видео.
Претходно имаше и најава дека Samsung ќе претстави мини верзија на Galaxy S6, но тешко е да се очекува дека тоа ќе се случи на овој настан.
Извор: Android Headlines, GSM Arena, Samsung
