На 13-ти Август, како и што најавивме претходно, корејскиот гигант ќе ги претстави новите таблет – телефони од високата класа, односно новата Note 5-ка, како и новиот модел, Galaxy S6 Edge Plus.
Според она што можеме да го видиме на фотографијата, која ја имаме благодарение на популарниот твитерџија Evan Blass, дизајнот ќе биде скоро ист како оној на Galaxy S6, со метална рамка од страните и стакло позади. Особено модерно делува малата рамка од страните, која кај моделот Edge всушност и не постои, бидејќи дисплејот е заоблен.
Интересно, за разлика од претходникот, Edge варијантата овој пат ќе биде поголема верзија на моделот Galaxy S6 Edge, со малку послаб Snapdragon 808 процесор со шест јадра, 3 GB рам меморија и Super AMOLED дисплеј со резолуција од 2560х1440 пиксели и големина во дијагонала од 5,5 инчи.
Galaxy Note 5 пак ќе биде најдоброто од Samsung досега. Ќе има 5,66 инчен дисплеј со 2560х1440 пиксели резолуција, моќен Exynos 7420 чипсет со осум јадра, кој е моментално најмоќен кај мобилните телефони, огромна 4 GB рам меморија и 32 GB простор за складирање податоци, за жал без слот за micro SD картичка. Задната камера ќе има 16 мегапиксели со оптичка стабилизација, веројатно истата како во Galaxy S6, додека предната ќе има 5 мегапиксели.
И двата модели ќе имаат “stylus” пенкалце и можност за работење со две апликации одеднаш на големиот дисплеј, како и секој Note модел досега, а со цел зголемување на употребливоста и можностите за мултитаскинг. Има и информации според кои Note 5 ќе биде достапен и како dual SIM изведба.
Извор: The Verge, GSM Arena, Evan Blass (Twitter)
