Веќе неколку пати го повторивме ова, но еве – Microsoft не успеа во мобилната дивизија и за тоа, покрај моќната Android и iOS конкуренција, најмногу се криви и тие самите, бидејќи според се што дознаваме сега за нивните обиди со Windows Phone, испаѓа дека не биле доволно упорни.

Последните информавии се за последните Windows 10 Mobile знаменосци, кои кога излегоа не го потресоа особено многу пазарот за паметни телефони. Причината за ова беше пред се нивниот дизајн со пластична изработка, но и недовршениот Windows 10 Mobile оперативен систем, кој буквално излудуваше со многу багови, сецкање, паѓање на перформансите и ред други помали и поголеми проблеми. Секако, шлаг на сето ова беше и недоволно големиот број на апликации.

Сепак, идејата на Microsoft додека ги развивала овие смартфони била многу различна. Имено, тие планирале овие смартфони да имаат поддршка и за дигитално пенкалце, исто како Surface дивизијата, што со вистински Windows 10 апликации за телефоните, ќе можеше да ги направи силен конкурент на Galaxy Note 7 серијата. Покрај пенкалцето, Microsoft планирал и специјални футроли со прозорче, слични на оние на цела плејада на Android конкуренти.

Покрај овие додатоци, Microsoft дури и планирал управување на дел од функционалностите на телефонот со движење на прстите на страничната рамка, скоро исто како денес што HTC направи со својот U11. Ова само ни покажува дека Microsoft имал иновативни идеи, но голем проблем со нивната имплементација во финалниот продукт.

Во иднина за жал не би требало да очекуваме многу смартфони со Windows 10 Mobile. Мобилната дивизија на Microsoft скоро сигурно ќе лансира нови уреди, но тоа нема да бидат класични смартфони. Очекувајте таблет/лаптоп со помали димензии со Surface лого, од кој ќе може да правите и повици, но никако класичен паметен телефон.

Извор: Windows Central, MS Power User, XDA

Претходна статијаGoogle додаде Personal лента во резултатите од пребарување
Следна статијаКритична маса #61: Скопје, стани за 5-ка!