Едни од најпознатите телефони на Samsung, а кои не се од највисоката класа, оваа недела се очекува дека ќе ги добијат своите нови верзии за годината. До крајот на неделата треба да ги видиме Galaxy A54 и Galaxy A34, но како и секогаш, некој го расипува изненадувањето со објава на видео каде целосно се прикажани уредите.
Видеото доаѓа од виетнамскиот YouTube канал „TD REVIEW“ и на него може да се види прво отпакувањето на уредите, по што следи и кратка презентација.
Тоа што може да се види е потврда на гласините дека оваа категорија на телефони од Samsung ќе го следи дизајн стилот на Galaxy S23 серијата. Задната страна е скоро иста како кај највисоката класа, па достапни се камерите без посебен модул под нив.
Двата телефони се разликуваат на предната страна кај „селфи“ камерата, односно кај Galaxy A54 истата е во форма на мала дупка, додека кај Galaxy A34 е споена со горниот дел.
Дополнително, од видеото може да се види дека телефоните ќе бидат достапни во нови, светли и интересни бои кои дефинитивно ќе ги издвојат уредите и ќе ги привлечат корисниците.
Видеото е во продолжение, а се што останува е за неколку денови да ја видиме и официјалната нивна презентација.