Остануваат уште околу месец дена до претставувањето на Galaxy S23 серијата, а најверојатно најважната новина која ќе ја донесат овие телефони е користењето на Snapdragon чипот во сите региони од светот. Тоа значи дека европските корисници, односно корисниците во нашата земја, нема да ја добијат верзијата со Exynos, која не се покажува баш најдобро изминатите години.
Најнова неофицијална информација поврзана со перформансите на Galaxy S23 серијата, покажува прилично големо подобрување во споредба со Galaxy S22 серијата. Не е точно истакнато дали споредбата се прави со европските или американските модели, но како и да е, Snapdragon 8 Gen 2, направен на 4nm технологија од TSMC, ќе направи да новата серија биде една од најдобрите досега.
Според информациите, процесорот кај Galaxy S23 серијата ќе донесе 36% подобрување во споредба со претходниците, а ова подобрување кај графичкиот процесор ќе биде дури 48%. Процесорот за вештачка интелигенција, односно машинско учење добива подобрување од 60%.
На ова треба да се додадат најавите дека големо подобрување добива и системот за ладење, нешто што зависи и од подобриот чип, па корисниците ќе добијат телефони со перформанси кои ќе може да се носат со уредите на Apple.
Ќе видиме што се од шпекулациите ќе испадне точно, а со нетрпение ги чекаме тест уредите за да можеме и самите да се увериме во промените.
