Финскиот производител годинава се враќа на голема врата на пазарот на паметни телефони, но веројатно ќе продолжи и со производството и на таблети. Имено, според протечени информации од GFXBench, тие спремаат огромен 18,4 инчен таблет до Android.
Таблетот ќе нема многу конкуренти на пазарот, освен можеби Samsung Galaxy View кој можеби делува импресивно, но немаше особено голем импакт на пазарот. Всушност, малку е чудно зошто Nokia воопшто би се одлучила на Android за овој таблет, бидејќи тој оперативен систем е повеќе оптимизиран за уреди со големина до 7 инчи.
Windows 10 би бил многу подобар избор за толку голем дисплеј, бидејќи ќе овозможи користење на програми дизајнирани исклучиво за големите екрани. Ова особено добива на тежина по објавата на Microsoft дека Windows 10 ќе може да работи и на ARM чипови. Да се надеваме дека покрај Android верзијата, која ќе доаѓа со последната надградба Nougat, Nokia ќе се одлучи и на Windows верзија на овој таблет.
Во гигантскиот таблет на Nokia има токму ARM чип и тоа најмоќниот Snapdragon 835, кој треба да почне наскоро да се вградува и во други уреди. Притоа, тој е помогнат од „здрави” 4 GB рам меморија и има 64 GB простор. Во манирите на Nokia и камерата е одлична – има 12 мегапиксели, додека пак дисплејот има висока резолуција од 2560х1440 пиксели (QHD) која е веројатно минимумот за толку голем дисплеј.
HMD Global, компанијата која стои зад развојот и производството на уредите со Nokia брендинг, овој уред најверојатно ќе го претстави на Mobile World Congress во Барселона на крајот од Февруари, заедно со смартфон знаменосец со Snapdragon 835, кој тие го најавија на својата кинеска Weibo страна и кој би требало да предводи цела плејада на смартфони оваа година.
Извор: Pocketnow, T3, Phone Arena
