Според познатиот руски блогер – Eldar Murtazin, Microsoft му понудил на Samsung милијарда долари доколку корејскиот гигант се согласи да го поддржи Windows Phone оперативниот систем со нов уред.
Кога Windows Phone 8 за првпат се појави на пазарот, Samsung излезе со Ativ S паметниот телефон кој го користи оперативниот систем на Microsoft. Меѓутоа, овој телефон не ги задоволи очекувањата на корејската фирма и остана во сенка на популарната Galaxy линија на Android телефони.
Моментално, најголемиот производител на Windows Phone паметни телефони е Nokia, но и покрај тоа што имаат солидна понуда во својата Lumia линија, нивните уреди не се премногу популарни кај корисниците.
Од Microsoft сметаат дека за да се зголеми прифатеноста на Windows Phone, потребен им е телефон кој ќе биде вистински хит кај корисниците и како најдобар облог за креирање на таков уред го гледаат Samsung.
Засега нема официјален коментар од компаниите во врска со овие гласини.
