Кинеските производители на мобилни телефони се почесто ги гледаме како на пазарот претставуваат одлични уреди, а цената сепак не се движи некаде во границите над 35.000 денари. Lenovo е веќе познат бренд кој што корисниците добро го познаваат, меѓутоа прашање е колку од нив, а посебно во нашата земја, имале шанса да користат некој од нивните телефони.
Vibe X2 од оваа компанија е мобилен телефон кој што беше преставен во Септември оваа година, по што стана достапен еден месец покасно. Достапен е за корисниците во нашата земја на повеќе продажни места, а се продава по цена од 25.990 денари.
Уредот доаѓа со прилично уникатен дизајн, кој што е направен да изгледа како повеќе слоеви наместени еден врз друг. Секој слој е направен во различна боја која што завршува со црна боја на екранот. Корисниците може да изберат од неколку главни бои меѓу кои златна и бела.
Она што веднаш се забележува кога првпат го користите овој телефон е колку е тој лесен. На тоа се додава и малата дебелина, карактеристики кои што го прават Vibe X2 навистина едноставен и удобен за користење без разлика дали со една или двете раце.
Карактеристиките го ставаат некаде во средната или во средно високата класа, а истото може да се види и од неговата цена. При користењето се забележуваат одличните перформанси кои што се карактеризираат со навистина течна работа како на корисничкиот интерфејс, така и на работата и отворањето на апликациите.
Како и уште еден кинески производител за кој што често можевте да прочитате на Смартпортал, така и Lenovo користи променета верзија од Android оперативниот систем која што сите инсталирани апликации ги поставува на home екраните. Ова е нешто што е карактеристично за Apple, односно нивниот iOS оперативен систем, кој што кинеските производители често го користат како инспирација.
Корисничкиот интерфејс кој што го развива Lenovo е интересно направен во минималистички стил. Работата со него е едноставна и не додава премногу од основното Android искуство, што според мене е добра работа. Вклучува посебно направени апликации за безбедност, споделување на фајлови и слично.
Она што се истакнува кај корисничкиот интерфејс е можноста за промена на теми, кои што ја менуваат позадината, боите и иконите. Сето ова може и посебно да се менува, но сепак изборот од готови теми ја олеснува работата.
Што се однесува до карактеристиките, Lenovo Vibe X2 доаѓа со следните:
Димензии и тежина | 140.2 x 68.6 x 7.3 mm 120 грама |
Екран | 5 инчен IPS LCD екран 1920 x 1080 пиксели 441 ppi |
Процесор | MediatTek MT6595m True8Core Quad-core 2.0 GHz Cortex-A17 & quad-core 1.7 GHz Cortex-A7 PowerVR G600 GPU |
Меморија | 2GB RAM 32GB внатрешна меморија |
Оперативен систем | Android 4.4 |
Камера | 13 MP задна камера 5 MP предна камера |
Батерија | 2.300 mAh |