За оние кои не се многу запознаени со Sailfish OS оперативниот систем за паметни телефони на компанијата Jolla, се работи на проект на поранешни вработени во Nokia, кои го имаат наследено MeeGo OS. Sailfish OS е прилично модерен систем, со исклучително напреден кориснички интерфејс, но веќе неколку години се мачи за пробив на пазарот.
Работите би требало конечно да се придвижат во вистинската насока, благодарение на соработката со индискиот производител Intex, кој веќе има неколку Android модели. Првиот нивни модел со Sailfish OS ќе се вика Aqua Fish – комбинација од имињата на Aqua линијата на смартфони на Intex и секако на името на опреативниот систем.
Телефонот има просечни спецификации – дисплејот има големина од 5 инчи и HD резолуција, процесорот е од Qualcomm со четири јадра на 1,3 GHz помогнат од 2 GB рам меморија, а вграден е и 16 GB простор со можност за проширување преку micro SD картичка.
На Sailfish OS инаку може да се инсталираат и Android апликации, односно .apk датотеки, но корисниците тоа ќе мораат да го направат сами – тука нема вграден Play Store. Корисничкиот интерфејс инаку целосно се базира на “Swipe” команди, односно на лизгање на прстот – нема копчиња за враќање назад или “Home”.
Поточно, со лизгање на прстот од почетниот екран нагоре, лево, десно или надолу, може да се стигне до сите апликации, нотификациите, менито за мултитаскинг и “Super Apps”, кои се новитет во 2.0 верзијата и кои донесуваат различни премиум сервиси, како на пример за пуштање онлајн музика и сл.
Intex Aqua Fish ќе биде достапен во Индија во Април и од неговиот успех таму многу ќе зависи дали Sailfish OS ќе се прошири и на другите пазари во светот.
Извор: Engadget, Android Headlines, SlashGear
Фото: SlashGear
